ونەردەگى جاستار «ونەر بارىسى» ءتۋرنيرىن وبلىستىق «كوستانايسكيە نوۆوستي» گازەتىنىڭ «جيزن نا لادوني» جوباسىمەن بىرىگىپ, قايىرىمدىلىق شاراسىنا اينالدىردى. تۋرنيردەن تۇسكەن قارجى جانگەلدين اۋدانىنداعى اقەركە جەكسەنباي اتتى 8 جاسار قىزعا زاماناۋي ەستۋ اپپاراتىن ساتىپ الۋعا جۇمسالادى.
تۋرنيرگە وبلىس وڭىرىندەگى 20-40 جاس ارالىعىنداعى ءانشى, كۇيشى, جىرشى, مادەنيەت قىزمەتكەرلەرى جانە اسابا بولىپ جۇرگەن 32 ونەرپاز جىگىت قاتىستى. سونىمەن, بوزكىلەمگە شىققان اۋەسقوي بالۋاندار ءتۇرلى سالماق دارەجەسى بويىنشا كۇش سىناستى. ء تۋرنيردى ناعىز بۇگىنگىنىڭ سال-سەرىلەرى اراسىندا وتكەن دودا بولدى دەسەك تە جاراستىنداي.
ەكى توپقا ءبولىنىپ بەلدەسكەن بالۋاندار اراسىندا 65 كەلىدەن جوعارى سالماقتا تالعات القوجا ءبىرىنشى ورىندى جەڭىپ الدى. ەكىنشى ورىندى قالىبەك ءالي ەنشىلەدى. ءۇشىنشى ورىنعا داستان بەكوۆ جايعاستى. ال اۋىر سالماقتا بەلدەسكەن توپ اراسىنان ەرلان قاسىموۆ سۋىرىلىپ العا شىعىپ, «ونەر بارىسى» بەلدىگىن جەڭىپ الدى. ەركەبۇلان قۇرمەتوۆ تيىسىنشە ەكىنشى ورىندى ەنشىلەسە, باعدات نۇرمۇحامبەتوۆ جۇلدە كومبەسىنىڭ ءۇشىنشى ساتىسىنا كوتەرىلدى.
«رۋحاني جاڭعىرۋ» دەگەنىمىز ەسكەرتكىش ورناتۋ, ءيا بولماسا اعاش ەگۋ ەمەس, ول سانانىڭ جاڭعىرۋى. بۇگىنگى تۋرنير وسىنداي ماقساتتا ۇيىمداستىرىلعانىن ايتا كەتۋ كەرەك. جوبانى قولعا العان تولەندى القوجين ءتارىزدى ازاماتتار ارامىزدا كوپ بولعاي. سوندا عانا, ۇلتتىق ونەر, ۇلتتىق سپورت داميتىن بولادى» دەدى ءتۋرنيردىڭ سالتاناتتى ماراپاتتاۋ راسىمىندە وبلىستىق مادەنيەت باسقارماسىنىڭ باسشىسى ەرلان قالماقوۆ.
ايتپاقشى, «ونەر بارىسىن» قولداۋعا الماتىدان سەرىكبولسىن كىشكەنباەۆ پەن ەرنار سادىرباي ءتارىزدى جاس ەسترادا جۇلدىزدارى كەلىپ, جانكۇيەرلەر الدىندا ونەر كورسەتتى. وسىلايشا, ولار دا كىشكەنتاي اقەركەنى قولداۋعا شاما-شارىقتارىنشا ءوز ۇلەستەرىن قوستى.
ءنازيرا جارىمبەت,
«ەگەمەن قازاقستان»
قوستاناي
